highlight and bronze

 السلام عليكم
كتير طولت على مدونتي :)
اليوم حابة اتكلم ع استخدام جميل للهايلايت والبرونزر غير استخداماتهم الأساسية
الشيء دا لو عرفتي تسوية بشكل دقيق أنا أضمن لك الكل راح يسألك متغير شي بوجهك وبشفايفك

كيف نبرز الشفاة بشكل جميل بدون ما نحتاج عمليات ومواد ومستحضرات ما نعرف كيف تدخل لأجسامنا

حيلة بسيطة جداً
ع حدود الشفايف العليا نستخدم الهايلات بشكل بسيط جداً بحيث يضرب ضوء فيها بدون ما يكون واضح جداً إننا حطينا هايلات ووتحت حدود الشفاة السفلى بلمسة خفيفة جداً , أخف شي نحط برونز بحيث يعطي ظل للشفاة وكأنها بارزة وبدون مبالغة
وارسمي شفايفك عادي وحطي روجك وأنبسطي بشكلك :)

نقطة مهمة المفروض تكون بالحسبان مو أي هايلايت ولا أي برونز نقدر نلعب فيه بوجهنا
أي شي شيمر من الهايلايت حلو شيمر مو قليتر .. القليتر خطأ

زي دا الهايلات من  ذا بلام

اختاري أي هايلايت يناسبك ويناسب ميزانيتك بس راعي النقطة دي

وكمان فيه برونز يديك كدا لمعة خطأ خطأ خطأ
المفترض بالبرونزر أنه ما يلمع لا , يكون مطفي جداً حتى ينحت الملامح يعطيها شكل مو يطلعك مضروبة ومبسوطة

تقدري تبحثي عن أي برونز يريحك او حتى الجميل دا من نيكد بفلاشد إلي بيجمع هايلايت وبرونز وبلشر

أتمنى تكون التدوية اليوم واضحة وبتعجبكم يا رب
وشكراً , أشوفكم بتدوينه تانية  :)

 

all about red lip's

السلام عليكم
اليوم راح يكون بالضبط عن الشائع هالموسم ( خريف - شتاء ) عن لون أحمر الشفاة
والمكياج للوجة عموماً

الوجة خالي من العيوب فلولس زي ما يقولوا والتركيز الفترة دي ع الشفاة
أحمر أحمر أحمر

الشفاة حمراء بدرجاتها , بس الأحمر الصريح أو الأحمر التوتي هوا أكتر شي منشر وراح يضرب كمان بالشتاء

من الأرواج  تقدري تختاري  من ماركة شانيل  Pirate

هوا أحمر مخملي ورائع ثباته
أو من لانكوم 103 rouge mousseline

المميز فيه أنه مطفي كتير ودرامتك رهيب ينفع كتير للبشرة السمراء والحنطية أكتر من البيضاء
أو روج YSL  35 rouge vernis

أحمر أحمر بجد

حتى البراند البسيطة تقدر تضاهي الكبيرة بأحمر الشفاة
من لوريال pure burgandy

اللون غامق ورهيب يضاهي إلي من لانكوم ببساطة
أو من NYX vibrant red

أحمر توتي بشكل جميل وسلسل
أو من نفس الماركة deeb cranberry red

 

المميز فيه كأنه قلوس بس أنه روج ثابت وما يحتاج لقلوس ابداً

أو من ماكس فاكتور رقم 820
أو ريميل 90

 

أو ويت ان وايلد 911D stoplight red

 

طبعاً السيزون دا إعادة إحياء شكل مارلين مونرو القديم
الوجة بسيط والعيون محددة بشكل دقيق والشفاة جريئة

طبعاً صعب الأحمر يتحط بالصبح لأنه للمساء أكتر بس تقدري إذا امتلكتي جراءة أنك تخرجي بيه
كل الماركات الكبيرة تقدروا تلاقوها بسيفورا أو وجوه أو فافافوم
والماركات التجارية بسنتر بوينت أو صيدلية بوتس أو ايكونيك
طبعاً حسب إلي اعرفه أن ماركة ويت ان وايلد مو موجودة عندنا بالسعودية بس فيه أكاونت بنت جميلة بالأنستجرام توفرة لكم
I_USKSA  او على تويتر @I_USKSA  توفر اشياء كتيرة غير ويت ان وايلد من مكياج
اتمنى يكون البوست عجبكم :)
تقدروا تتابعوني ع الانستقرام OMJFK 
سلام

يحق لنا شكرهم وانتقادهم

السلام عليكم
برضو زي ما قبل بدا القسم انتقدنا وشكرنا هالمرا برضو

قبل مدة كنت بH&M  فرع مجمع العرب .. وبصراحة كبيرة لقيت معاملة جميلة جداً من الموظفات هناك .. بحب اشكر رنا الشيخ موظفة الكاشير على تعاملها وسرعتها بتلبيه رغبات الزبائن وايضاً اشكر الموظفات  كلهم إلي بالفرع كانو قمة فـالرقي واللطف بالتعامل دا غير الخدمة إلي تحسسك أنه داخلة مكان خاص بيكِ وكل شي تطلبيه يجي بسرعة لكِ .
شكراً كبيرة رنا الشيخ وصديقاتها .

للأسف بعكس مجمع العرب الفرع إلي بحراء الدولي H&M   كان التعامل سيء جداً  ما بعرف موظف الكاشير شاب شكلو جديد ع المكان ولا ايش بس محد ابداً كان خدوم هناك وحتى فيه موظفة جلست ساعة اردد قدامها ابغاها تبدلي القطعة واقولها لو سمحتي ممكن خدمة يمكن تلات مرات كانت مشغولة تتكلم ع الجوال ولا ادتني بال , ما اقول زعلت لأنه ما بعرف ايش الظرف إلي خلى الموظفين بالفرع هناك كلهم كدا .. ما كنت حابة اكتب تعليق عليهم بمدونتي بس أنا من البداية حابه اظهر الجانب الحسن والجانب السيء يمكن نطغى على الجانب السيء بكرا ونترتقي بالخدمة بالمبيعات بكل المحلات , بس اللأمانة تحتم عليا اقول رأيي بصراحة فيهم .. أتمنى ارجع الفرع تاني مرا والاقي معاملة افضل من إلي شوفتها اقبل اسبوعين .

بحب برضو اشكر موظفات بوتس بفرع حراء الدولي إلي كانو يجننو بجد , بالرغم من أنهم اغرموا بولدي الصغير وتركوني افتل لحالي بالمحل بس كانو عند الخدمة بسرعة إذا طلبتهم دا غير اللأبتسامة إلي كانت نور ع وجيههم لكل الزبائن , شكراً موظفات بوتس .

الموظفات السعوديات يوم بيوم يثبتوا أنهم قد الوظيفة وقد التعامل مع الجمهور ومسؤولات  عن الي بيقدم لهم وبيقدموه هما , شكراً لكل فتاة قدرت تغير الصورة  السلبية القديمة عن المرأة السعودية .

لا أشبه أحدا

ديوان للشاعرة اللبنانية  سوزان العليوان
ديوان خفيف قد لا يأخذ في قرأته منك ساعة ولكن ستعيش معك قصائده دهراً
تتمتع بمحاكاة الواقع باسلوب خفيف انيق ومؤثر جداً

من الكتاب

وجوه 1
لأنّكَ وحيدٌ
وروحُكَ شاحبةٌ
تلوّنُ وجوهَ أطفالِكَ بالمساحيق
ثمّ تجلسُ قبالتَهُمْ
.وتبكي


سوزان عليوان ليست شاعرة فقط بل ورسامة أيضاً .. ولها اصدارات ولوحات كُثر
بموقعها هنا ستجدون ما يدهش فعلاً
http://www.suzanne-alaywan.com/

لن أحكي عن الديوان كثيراً سأجعل القصائد هي من تتحدث


أزل


ليتني كنتُ
حينما كانت أمِّي
طفلةً حزينةً
تحتاجُ إلى صديقةٍ
.في مثلِ حزنِها

ليتني كنتُ هناك
أقاسمُها وحدتَها
يتمَها
وليتني كنتُ أكبرَ منها قليلاً
.لأكونَ أمَّها


قصائدها ليست قصائد فقط بل رسائل نتمنى لو نرسلها نحن لمن نعرف ونحب

زمن الطفولة



(إلى أبي)
خذني
من يدي الصغيرةِ
إلى مدينتِكَ
مثلما كانَ الحزنُ يأخذني
.إلى مدرستي

رُدَّني
إلى ضفيرتي
.إلى مهري البنيّ الحزين
رُدَّني
إلى صورتي القديمةِ
.في مرآتي

خذني
حيثُ للأطفالِ
قلوبٌ ملوّنةٌ
وللأحصنةِ الخشبيّةِ
.أجنحة

.رُدَّني

هنا سوزان عليوان ترسمنا بقصائدها لكنها لا تشبه أحدا .  

بيبلوم ليس على كل شي جميل

السلام عليكم

موضة البيبلوم أو الرفرز أو الكشكش ظهرت بشكل كبير جداً على كل شيء تقريباً في الألبسة وبالذات ع التنانير , غير أن البيبلوم موضة جميلة جداً بس مو ع كل شيء يكون شكل الببيلوم مضبوط  :/

تنورة من ريفر ايسلاند تقريباً ع استرتش قماشتها البيبلوم كان ع جلد , والجلد ترند السنة دي والسنة إلي قبلها بس كان شكلهم مع بعض بشع جداً

طول الجلد البيبلوم  قصير بالنسبة لطول التنورة إلي تحت الركبة بشويا أو تقريباً ع الركبة بس مغطيتها ..

التنورة شكلها عملي جداً وقماشتها برضو وحرام ما تنلبس بشكل صحيح لأنه القطعة الجلد دي مقيدتها ومبشعتها
كل إلي سويته شلت البيبلوم وضبطت التنورة

حاولوا لمن تنزعوا القطعة يكون بشكل نضيف حتى ما نعدم التنورة أو وديها للخياط عشان تضمني أنه يضبطها لك بشكل جميل
كدا التنورة صارت اجمل بكتير وارتب وراح تنلبس كتير جداً

تعديل بسيط برضو بس اعطا فرق كبير للتنورة
تعديلات تانية أن شاء الله تكون كبيرة بالبوستات القادمة .:)
 

كلمة شكر

السلام عليكم
كلمة حق لازم تنقال , والشكر ايضاً واجب علينا للمحسن بعمله
تقريباً عمل النساء بالمحلات التجارية ماله سنتين , وكتير لاحظنا اخطاء منهم أو يمكن عدم مهنية بالتسويق ومقابلة الجمهور ( الزبائن ) لكن في نماذج مشرفة بدأت الاحظها ببعض العاملات , تخليني اغير نظرتي عن عمل النساء إلي احبطني بالفترة لأولى له من تصادم شفته معاهم اثناء بحثي عن قطع او سؤالهم وعدم درايتهم عن البضاعة إلي يسوقوا لها .

أحلام فخر الدين بمحل ادريانا فرع مجمع العرب , شكراً لكِ على لطفة ومهنيتك وحسن تعاملك مع زبائن المحل , شكراً لكِ على بشاشتك ومساعدتك ورحابة صدرك للزبائن , أنتِ فخر للمرأة السعودية العاملة , شكراً لكِ واتمنى لك التوفيق .

موظفات باريس جالوري فرع الردسي مول شكراً لكم على تعاملكم الراقي والأبتسامة الجميلة , ولموظفين الفرع أيضاً شكراً .

شكراً لمدير معرض آن كلاين نيويورك فرع الردسي مول الأستاذ سامر سواح , على لطفه وتعامله الجميل وعلى سماحة لي بالتصوير داخل المعرض دون اعتراض كبقية المعارض .

النماذج المشرفة تستحق ذكرها وشكرها , لنشكرهم .

Light ( red , golden ) brown

السلام عليكم .
اليوم حابه أتكلم عن شيء مهم جداً جداً جداً
صبغات الشعر لهذا الموسم .:)
الموسم إلي فات لاحظنا الأمبري بشكل هائل أنتشر ولازال موجود بس ع استحياء زي ما يقولوا , إلي صابغة شعرها اومبري دوبها وحاباه الله يهنيها فيه تجلس عليه عشان ما تعدم شعرها دحين معانا وتصبغ :/
الألوان السنة دي ظهرت بنهاية الصيف بالخريف دحين الأحمر الفاقع شويا بس طبيعي أحمر مو أحمر كأنه نار لا سمح الله .
راح أوريكم صور عشان تكونوا معايا ويكون الشرح أسهل

 

نبدأ بسرين عبدالنور الكل لاحظ شعرها بمسلسل لعبة الموت , جداً جريء وجميل  هوا دا اللون الي السنة دي التركيز عليه , تتمحور الألوان السنة دي كلها ع القاعدة ( اللون البني ) وتختلف بحدة اللون المضاف عليه سواء أحمر ولا ذهبي ..

 

 

 

صيف ومازال في الخريف وراح ندخل ع الشتاء والبني المحمر هوا الطاغي أكتر من البني الذهبي إلي ممكن يكون لنهاية السنة دي راح نشوفه أكتر .
تبغي تكوني جريئة وتصبغي بني أحمر ,

طبعاً اللون دا ضرب كتير بالصيف بشكل جميل .

ع الشتاء راح ندخل ع البني الذهبي أكتر , مازالت الدائرة اللونية تميل للأحمر بس ذهبي أكتر

 

 

 

اللون البني الخفيف إلي فيه لمسة ذهبي , بعكس الأحمر بيمشي ع جميع انواع البشرة الفاتحة والسمراء بس بشرط أختيار درجة البني الملائمة إلي تبعاً لها راح تكون درجة وحدة الذهبي بالشعر

 

 

 

 

إذا ما قدرتي تلاقي البني الذهبي إلي يمشي معاك كصبغة وحدة تقدري تصبغي بني وتدخلي خصل صغيرة جداً بلون ذهبي تعطي تموج لشعرك .. أنا بشوف أنه البني الذهبي أجمل شويا من الأحمر مع أنهم كلهم ع الموسم السنة دي بس إلي يشفع للبني الذهبي أنه بيعطي شكل كثيف للشعر وصحي أكتر بينما الأحمر يبغاله أساساً شعر صحي وكثيف .

 

طبعاً اتكلمت عن الصبغات بالأول لانه شيء محد يقدر يخاطر فيه زي اللبس إلي ممكن انزل اليوم ع السوق واشتريه ويفضل معايا  , الصبغة راح تجلس ع شعرك شهور عشان كدا لازم تقتنعي باللون قبل ما تخاطري بنفسك .

 

بالبوستات التانية راح نحكي أكتر عن أيش التوب في الموسم إن شاء الله

سلام :)

 

 

تعديل بسيط

السلام عليكم
اليوم راح اتكلم عن الشيء إلي من خلاله اتولدت فكرة انشاء مدونة , إلي هوا اصلاح المتضرر من الملابس عندنا ..أو إضفاء لمسة بسيطة للملابس تعطيها شكل مختلف عن الأساسي إلي هيا كانت فيه .
اليوم راح أنزل لكم شي من سنة تقريباً عملت عليه تعديل
جاكيت رمادي .. قصة الجاكيت قصة :) أختي اشترته بعدين ما اقتنعت فيه لأنه شكلو بيدي ولادي مرا غير لونه فحولته لأختي التانية إلي ما ناسبها مقاسه ومن هنا وهناك وصل الجاكيت ليا .. كنت مثلهم بوديه لأحد عشان مقاسه شويا كبير بس مو مرا بس قلت خليه عندي يمكن استفيد منه واللبسه بيوم . بلحظة قررت اعمل تغيير بسيط عليه , بسيط جداً

 

 

دا الجاكيت بشكله الأساسي :_

 

 

 

كل إلي عملته أني غيرت الأزارير حقته وتغير شكل الجاكيت حتى باللبس

 



 

دي الأزارير إلي اضفتها ع الجاكيت بدل أزاريره الرمادية

اشتريتها من محل جستينيه بحراء الدولي

 

 

ودا الجاكيت بالشكل النهائي

يمكن بالتصوير مو واضح بالمرا بس بالواقع عمل تغيير كبير , ع قولت زوجي وأختي اداه فخامة ولوك بناتي أكتر , كانوا بالأول مشككين أني راح اعدم الجاكيت لأنه الأزارير ذهبي والجاكيت رمادي

اللونين دولا يمشوا مع بعض بس بشكل محدد , يعني مو كل ذهبي يمشي مع فضي ونراعي الحجم وبعد اللون كمان

اتمنى أنه يعجبكم , ونحاول مع بعض انه نكسب ملابسنا لمسة بسيطة تغير من شكلها

الاقيكم بتدوينة جديدة إن شاء الله

سلام :)

 

السلام عليكم

أول بوست واول حديث عن نفسي
كتير بحب التسوق , مدمنة تسوق ودا شيء خطير جداً .. من فترة سنة تقريباً وجدت شغفي
لمن أكون بالمحلات واشوف وحدة تايهة كدا وهيا تختار دغري اعرض خدماتي بدون ما أحد يطلب
- أقدر أساعدك
- أنتِ تشتغلي بالمحل
- لا بس شفتك محتاره قلت أشوف أيش تبغي وأساعدك , ع فكرة البلوزة حلوة << بداية عرض الخدمة
ودغري البنت معايا تسألني أيوا بس مترددة فيها ع أيش تلبق
وأروح معاها الفلف بالمحل وبعض الأحيان أخرج معاها لمحل تاني وانقيلها واضبطلها اللبس :)
وكتير أنبسط لمن أشوف وحدة طايرة من الفرح أنه ساعدتها وحصلت إلي تبغاه بجهد قليل , وبعض الأحيان بمال قليل
برمضان كنت بأتش أند أم

دي الصورة قبل يومين أخدتها لواجهة المتجر بمجمع العرب

 

المهم كنت بقسم الأطفال أختار للصغيّر لبس أشوف وحدة ينفخ فيها الموظف ويقولها أي شي يمشي مع البنطلون , كانت مختارة لبنتها بنطلون ابيض مع أسود وماهي عارفة قمت ع طول جيتها واخترت معاها بلوزة موف فاتح ابتسامة البنت أنه حصلت ع إلي تبغاه خلتني أخرج من السوق وما أشتري لنفسي شيء .. أنبسطت لها , حسيت يومي كله فرح بس أنه البنت اشترت للعيد شيء جديد .

عشان كدا إذا شفتوا وحدة متلثمة تعرض خدماتها أنه تساعدكم بالتسوق ما تخافوا دي أنا :)
وأيامكم سعادة .
 

مرحباً

السلام عليكم ورحمة الله وبركاته
أهلاً بكم زوار مدونتي
هذه المدونة ستكون خطوة بسيطة لي ولكم , بعالم صغير جداً أهواه 
عالم الأزياء
فـ مرحباً